Մի՛ վախեցիր ասել «ոչ»

Կարծում ես, թե ընկերոջդ նախասիրությունների նկատմամբ կեղծ հետաքրքրություն ցուցաբերելը նպաստում է ձեր հարաբերությունների ամրությանը, սակայն փորձագետներն ասում են, որ շատ ավելի լավ կլինի, եթե զերծ մնաս «Մեծ պայթյունի թեորիայի» մարաթոնը հաղթահարելուց: Փորձագետնե՛ր, շնորհակալություն:

Ընկերդ ոգևորված պատրաստվում է բեյսբոլի շաբաթօրյա խաղը դիտելուն, և նույնիսկ եթե սպորտը քեզ համար նույնքան հետաքրքիր է, որքան ֆիզիկայի ոլորտի վերջին նվաճումները, դու, միևնույն է, միանում ես նրան: Ի վերջո, հարաբերություններ ունենալ նշանակում է միասին ժամանակ անցկացնել՝ անելով այն ամենը, ինչ զուգընկերդ է սիրում, եթե նույնիսկ դա քեզ դուր չի գալիս: Այդպե՞ս է:

Դե, ոչ միշտ: «Ամուսնություն և ընտանիք» ամսագրում հրատարակված նոր ուսումնասիրության համաձայն՝ նման վարքագիծը կարող է լրջորեն ազդել ձեր երջանկության վրա: Իրականում փորձագետները պնդում են, որ հարկավոր է ավելի հաճախ ասել ոչ, երբ նա խնդրում է անել մի բան, ինչը քեզ դուր չի գալիս: Եվ ահա թե ինչու...

Դու մնում ես այն նույն թռչնակը, ում համար նա խենթանում էր

«Զույգը երկուստեք գոհ ու բավարարված է լինում այն ժամանակ, երբ կինն անկեղծ է մնում իր նախասիրությունների հարցում»,- ասում է Ալեն Բերգերը` «Սիրային գաղտնիքները բացահայտված են» գրքի հեղինակը: - Տղամարդիկ իրենց ավելի ազատ ու անկաշկանդ են զգում, երբ գիտեն, որ իրենց զուգընկերն այլ նախասիրություններ ունի և կենտրոնացած չէ միայն հարաբերությունների վրա:

Իսկ կանայք ավելի լավ են զգում, երբ չեն դավաճանում իրենց սկզբունքներին ու նախասիրություններին և երբ ստիպված չեն լավ տրամադրություն կեղծել»: Դատիր ինքդ. երբ դու ամեն կերպ ցանկանում ես փախչել այդ վայրից, քեզ չափազանց դժվար է լինել էներգիայով լի այն զվարթ աղջիկը, ում նա սիրում է: Ավելին, եթե որևէ բան անում ես միայն պարտավորվածությունից դրդված, կարող ես զայրույթ զգալ նրա նկատմամբ: Իսկ նման էմոցիաները կարող են հավասարակշռությունից հանել քեզ և հանգեցնել վեճերի:

Նա կկառչի քո բոլոր բառերից

Եթե մշտապես միասին եք և փորձում եք կիսել նույն հետաքրքրությունները, կա սպառվելու և միմյանց ձանձրացնելու վտանգ: Բացի այդ, այսպես դուք միմյանց հետ զրուցելու և միմյանց պատմելու շատ քիչ բան եք ունենում: Իսկ երկար ու տաքուկ զրույցների բացակայությունը կարող է սառեցնել ձեր հարաբերությունները:

«Փոխարենը, եթե երկուսդ էլ զբաղված եք ձեր գործերով, միմյանց նորից տեսնելիս հաղորդակցվելու բուռն ցանկություն է առաջանում. չէ՞ որ կիսվելու և քննարկելու այնքան բան ունեք»,- ասում է հոգեբան Սեթ Մեյերսը: Եվ սա միակ առավելությունը չէ. այն բաները, որոնք սիրում եք միասին անել, կդառնան առանձնահատուկ և սիրելի: Եվ այսպես, ամենևին պարտադիր չէ միասին լինել բոլոր միջոցառումներին: Սկսիր ինքդ. նպաստավոր միջավայր ստեղծիր, որպեսզի նա կարողանա հրաժարվել քեզ հետ կապված որևէ զբաղմունքից:

Բացատիր, որ իսկապես կհասկանաս, եթե նա ներկա չգտնվի այն գրքի շնորհանդեսին, որին այդքան անհամբեր սպասում էիր: Իսկ երբ նա է քեզ հրավիրում գնալ մի տեղ, որտեղ, բացի խորոված ուտելուց, այլ բան չես անելու, անկեղծ եղիր: «Ասա նրան, որ դա իսկապես քոնը չէ»,- խորհուրդ է տալիս Մեյերսը: Նա կգնահատի քո անկեղծությունը, իսկ արդյունքում երկուսդ էլ լավ կզգաք ձեզ՝ ստիպված չլինելով անել բաներ, որոնցից ոչ միայն հաճույք չեք ստանում, այլ պարզապես սոսկում եք:

Հարցեր, պատասխաններ, մեկնաբանություններ